2 ministro ti pammati, nahold-ap

CANDON CITY – Dua a ministro ti pammati ti nahold-ap bayat ti panagur-urayda iti luganda iti igid ti national highway a sakup ti Barangay San Jose, ditoy siudad idi alas kuatro ti parbangon ti Abril 16.

Nagreport iti polis da Pedro Acierto, 74, nagretiron a ministro iti Iglesia ni Kristo, ken ni Alejandro Dasalla, 65, ministro iti INK, agpada a temporario nga agnaed iti Block 7, iti nadakamat a barangay, a hinold-ap ida ti uppat a lallaki a naglugan iti dua a motorsiklo ket intarayda dagiti bagda a naglaon iti kuarta, bank book ken gamitda.

Segun dagiti biktima, bayat ti panagurayda iti luganda iti igid ti kalsada, nagsardeng dagiti motorsiklo dagiti naka-bull cap a suspek, dimsaagda sada pinaturongan ida iti paltog, kagiddan ti panangibagada iti hold-ap.

Nagkedked ni Dasalla a mangited iti bagna a naglaon iti gamit ken P10,000.00 isu a pinalek ti maysa kadagiti suspek. Ginammatan met ti sabali ti bag ni Acierto.

Naitaray dagiti biktima iti ospital tapno maagasan ti sugat ni Dasalla.

Segun iti polis, adda naikabit a CCTV iti asideg ket posible a nairekord ti naisayangkat a panaghold-ap.#