Footer

2 motorista, dimmungparda iti lugan; naideklararda a DOA iti ospital

VIGAN CITY – Dua manen ti naireport a natay iti nagsina nga aksidente ti lugan a napasamak ditoy siudad ken Candon City itay nabiit.

Idi Agosto 28, naireport a maysa nga aksidente ti napasamak iti Jose Singson Street, Barangay 8, ditoy nga ili a nakainbolbaran ti maysa a Motopost motorcycle a minaneho ni Rexford Dayag Peralta, 35, naasawaan, ken residente iti Barangay Pantay Daya, Vigan City, Ilocos Sur.

Kas maibatay iti journal, agpaabagatan a pampanurnoren ni Dayag ti Jose Singson Street idi mapapati a dina nakontrol ti manibela a puon ti panagibar ti lugan ken nakaikrasanna iti dayaen nga abaga ti kalsada.

Naitaray ni Dayag iti Gabriela Silang Provincial Hospital ngem naideklara a dead on arrival gapu iti sinagrapna a dunor iti ulona.

Mapapati a nakainom iti nasanger ni Dayag iti napasamak ti aksidente.

Kabayatanna, positibo a nakainom da Isiah Gumangi, 18, baro, estudiante, ken ti insakayna a ni Jeffry Lao y Loque, 30, baro, agpada a residente iti Barangay Amarao, Sta. Cruz, Ilocos Sur, idi dinungpar ti luganda ti nakaparada ngs Isuzu truck iti igid ti kalsada ti Barangay Calaoaan, Candon City idi parbangon ti Agosto 28.

Kas maibatay iti palawag ni Frisco Gasangan y Gayas, 57, naasawaan, ken residente iti Brgy. LB Liwanag Compound, F. Bautista St., Ugong, City of Valenzuela, matmaturogda iti uneg ti luganda a nakaparada iti dayaen nga abaga ti kalsada idi nakangegda iti kanalbaag ket idi nagusisada, naammuanda a dinungpar ti motorsiklo a minaneho ni Gumangi ti tengnga ti makannigid a paset ti truck.

Naitarayen ni Lao iti ospital idi sumangpet dagiti nagresponde a polis ngem adda pay la ti drayber iti nakapasamakan ti aksidente.

Intaray dagiti polis ni Gumangi iti St. Martin De Porres ngem indeklara ti doktor a nangtaming kenkuana nga awanen ti biagna idi maidanon iti ospital.

Mapapati nga awan ti helmet dagiti biktima ken positibo a nakainomda iti arak. (Tawid News)