2 motorista, nadunor iti aksidente

STA. LUCIA, Ilocos Sur – Dua a lalaki ti nadundunor gapu iti panangdungpar ti motorsikloda iti kutit ti maysa a van iti Barangay Barangubong ditoy nga ili.

Segun iti report, agsarsaruno nga agpaabagatan ti maysa a van a minaneho ni Teodoro Malabed Jr., 49, naasawaan, agnaed iti Claveria, Cagayan ken ti Honda Wave a minaneho ni Renel Balase, 19, baro, residente iti Barangay Barangubong, ken nakiluganan ni Rodolfo Haban, 19, kalugaran ni Balase, idi kellaat a nagsardeng ti maysa a bus ta nagpidut iti pasahero ket saan a napakadaan ni Balase a nakaigapuan ti panangdungparna iti sarsarunuenna a van.

Naitaray dagiti biktima iti Candon General Hospital.#