2 motorsiklo, nagdinnungpar, 1 natay

CANDON CITY – Maysa ti natay idinto a nayospital ti dua pay a motorista idi nagdinnungpar ti luganda iti national highway iti Barangay Paras ditoy a siudad iti rabii ti Nobiembre 16.

Naideklara nga awanen ti biag ni Abner Reyes y Claro, 31, baro ken residente iti Barangay Mambog, Burgos, Ilocos Sur idi maidanon iti Resonable Hospital.

Naitaray met iti Candon City Hospital da Jeremy Ramos y Gambol, 19, baro; ken Benden Games y Gallardo, 20, baro, agpada a residente iti Barangay Villarica ti nadakamat nga ili.

Segun iti inisial nga inbestigasion, agpaamianan a direksion ti Honda XRM a minaneho ni Reyes idinto nga agpaabagatan ti Honda TMX a minaneho ni Ramos ket iti Nagbaudan Bridge a sakup ti Barangay Paras, nagiwes ti XRM a nagpakannigid a nakaigapuan ti panagdinnungparda iti TMX.

Gapu iti impact, dinungpar ti XRM ti makannigid nga abaga ti rangtay idinto a natnag ti TMX.

Segun iti report, positibo iti arak dagiti motorista, saanda a nakahelmet ken awan ti narekobre a lisensiada.#