NARVACAN, Ilocos Sur – Nagdinnungpar ti dua a motorsiklo idi bigat ti Septiembre 25 iti kalsada ti Barangay Cagayungan, ditoy nga ili a puon ti nakatayan ti maysa kadagiti nainbolbar iti aksidente.
Naitaray iti Central Ilocos Sur District Hospital ni Romeo Hernaez y Cabanilla, 47, mechanical engineer, ken residente iti nadakamat a barangay kalpasan ti pannungpar a napasamak iti agarup alas 8:30 ti Septiembre 25 ngem pimmusay iti sardam dayta met laeng nga aldaw gapu iti nakaro a dunorna iti ulona.
Naammuan iti inisial nga inbestigasion dagiti polis nga agdaldaliasat iti agsungani a direksion ti Yamaha Sniper 135 a minaneho ni Hernaez ken ti Honda XRM a nairehistro ken ni Jerry B. Rivera, residente iti nadakamat a barangay, a minaneho ni John Jayson Cabatu y Soria, 22, baro, idi nagdinnungparda.
Agtultuloy ti inbestigasion mainaig iti daytoy a pasamak.#