Footer

2 motorsiklo nagdinnungpar, 3 natay, 1 nasugatan

CANDON CITY – Nangala manen!

Daytoy ti nakuna dagiti residente  kalpasan a tallo a tao ti natay idinto a nakaro a nasugatan ti maysa iti panagdinnungpar ti dua a motorsiklo iti kalsada a sakup ti Barangay Darapidap ditoy.

Natay da Albert Ignacio, 17, residente iti Talogtog, Candon City, ken ti insakayna iti Honda Wave 100 a ni Alma Aguilar, estudiante ken residente iti Bitalag, Tagudin, Ilocos Sur,   ken ni Elvisly Agrisola Jr, 18, residente iti Darapidap ditoy, idinto a nakaro a nasugatan ti kinasakayna iti Honda Wave 125 a ni Richard Valdez, 23, ken residente iti isu met laeng a barangay.

Iti inisial nga inbestigasion ti polis, agturturong ti lugan a Wave 100, addaan plaka 5557 AE a minaneho ni  Ignacio iti daya idinto nga iti laud ti turong ti  Wave 125 a minaneho ni Elvisly Agrisola Jr.  idi mapapati a kimmaut ti naudi a lugan iti linia ti immuna ket dita a nadungparna ti kinasabatna.

Mapapati a saan a sigida a naitaray iti ospital dagiti naaksidente ket pimmusay da Agrisola ken Ignacio idinto a natay ni Aguilar bayat ti pannakaitarayna iti San Fernando City.  Naipan met ni Valdez iti St. Martin de Porres Hospital ditoy.

Kuna dagiti agindeg a mangal-ala ti nasao a kalsada agsipud ta adun ti nadisgrasia iti dayta a paset.

Kabayatanna, saanen a naidanon iti ospital ti biag ti maysa a pasahero gapu iti grabe a sugatna iti pannakatinnagna iti  traysikel a naglugananna bayat nga  agdaldaliasat iti Langlangca Primero ditoy.

Segun iti blotter ti polis, nagtugaw ni Fredelito Asitura, 42, naasawaan, residente iti Villa Quirino, San Esteban, Ilocos Sur, iti likud ni Willard Dionaldo, 23, ken residente iti San Esteban, Ilocos Sur, drayber ti traysikel a Honda TMX 155, addaan plaka ZT-2288.

Bayat ti panagdaliasat ti lugan iti kalsada, maysa a van ti nang-overtake kadakuada ken nangala iti liniada ket iti panangipaigid ti driver iti traysikel, natinnag ti biktima.

Naitaray ti biktima iti Candon General Hospital sa naiyalis iti Lorma Hospital iti San Fernando, La Union ngem saanen a naiyabot ti biagna.#