2 motorsiklo, nagdinnungpar; agpada a natay dagiti drayber

STA. CATALINA, Ilocos Sur – Agpada a pimmusay iti ospital a nakaitarayanda ti barangay tanod ken maysa a residente ditoy nga ili a nainbolbar dagiti motorsikloda iti aksidente iti Barangay Pangada idi agsapa ti Oktubre 18.

Agpada a kritikal ti kasasaad ni Freddie Sagucio y Tajon, 44, naasawaan, tricycle driver, nadutokan a tanod iti Barangay I, Vigan City ken ni Mariano Rafanan y Racsa, 55, residente iti Barangay Cabittaogan, ditoy met laeng nga ili gapu iti grabe a sugatda iti ulo maigapu iti nasao a vehicular accident a napasamak iti national road a sakup ti Barangay Pangada ket nagsarunoda a pimmusay bayat ti pannakataming dagiti sugatda iti St. James Hospital, Vigan City a nakaitarayanda kalpasan ti aksidente.

Naireport a natay nga immuna ni Rafanan sa ni Sagucio.

Segun iti panagimbestiga dagiti polis, mapapati a napaspas ti panagpataray ti barangay tanod ket dinungparna ti sarsarunuenna a motorsiklo a minaneho ni Rafanan.

Mapapati nga adda iti babaen ti inpluensia ti arak ti tanod idi mapasamak ti aksidente ti lugan.

Kabayatanna, dua a motorsiklo ti sinapgid ti maysa a kotse bayat ti panagdaliasatda iti national highway a sakup ti Barangay Bungro, Magsingal, Ilocos Sur idi malem ti Oktubre 15.

Naitaray iti Gabriela Silang General Hospital dagiti naglugan iti motorsiklo a pakairamanan da Alvin Aman y Rendura, 19, baro, ken residente iti Barangay Tamag, Vigan City, Irene Raguindin y Reotutar, 22, balasang, pump attendant ti Petron Gasoline Station iti Bantay, Ilocos Sur ken Annabel Muno y Birquis a nakikalubbon ken ni Aman.

Naammuan iti report ti polis nga agpaamianan a direksion ti Suzuki Rider motorcycle a minaneho ni Aman, ken ti Mio Soul Yamaha a minaneho ni Raguindin ket idi makadanonda iti paset a sakup ti Barangay Bungro, mapapati a kimmaut iti liniada ti sumungad a napardas ti panagtarayna a Honda Civic a minaneho ni Elmar Jacob y Balbin, residente iti Barangay Immayos Norte, San Juan, Ilocos Sur ket sinapgidna dagiti dua a motorsiklo.

Naikras dagiti motorsiklo iti road pavement a nagresulta iti pannakadundunor dagiti naglugan kadagiti motorsiklo.

Boluntario a simmuko iti polis station ti Magsingal ni Jacob.#