2 motorsiklo, natakaw

VIGAN CITY, Ilocos Sur – Dua manen a motorsiklo ti natakaw┬á ditoy siudad idi Enero 18.

Iti immuna nga insidente, nagreport iti polis ditoy ni Teddy Jacob Ramos, 41, naasawaan, ken residente iti Barangay Olo-olo, Santiago, Ilocos Sur, a natakaw ti Suzuki Raider 150 a motorsiklona bayat a nakaparking daytoy iti Quirino Boulevard, Vigan City idi malem ti Enero 18.

Segun ken ni Jacob, imparkingna ti motorsiklona iti nadakamat a lugar idi agarup 6:25 ti malem ti nadakamat a petsa ket timmabuno iti birthday party ti kaanakanna ket idi aggawid iti agarup 8:20 p.m., naduktalanna nga awanen ti luganna.

Kabayatanna, natakaw met ti motorsiklo ni Tristan Pacpaco del Castillo, 17, baro, estudiante, ken residente iti Gov. E. Reyes Street, Barangay 1 nga imparkingna iti sanguanan ti Fortune Hardware and Lumber idi agarup 8:30 ti nadakamat a petsa.

Imparking ni Del Castillo ti luganna iti nadakamat a lugar sa napan iti pagkarnabalan ngem idi aggawiden, awanen ti motorsiklona.

Sinawar ti biktima ti luganna ngem saannan a  nabirokan.

Sa la inreport ni Del Castillo a natakaw ti motorsiklona iti kabigatanna. #