2 nabagsol, 1 natagbat gapu iti inpluensia ti arak

STA. MARIA, Ilocos Sur – Dua ti nabagsol ken maysa ti natagbat iti las-ud ti tallo nga aldaw a maitudtudo a gapu iti inpluensia ti arak.

Iti report a dimmanon iti polis station ditoy, idi agarup 0:40 ti rabii ti Enero 15, nabagsol ni Felix Villegas y Galindo, 49, mannalon, ken agnaed iti Barangay Macabiag, ditoy nga ili babaen a mismo ti anakna a ni Marfil Villegas y Irrebaria, 22, baro.

Mapapati nga adda iti inpluensia ti arak ti anak idi bagsolenna ti amana.

Segun iti panagimbestiga dagiti polis, naggawid ni Marfil a nabartek ket nagprobokar a puon ti nangkomprontaran ti amana kenkuana ken panagringgorda ken nangbagsolan ti suspek iti biktima.

Intaray dagiti nagresponde a polis ti ama gapu iti sugatna iti makannigid a luppona iti Corpuz clinic and Hospital sa naiyalis iti Metro Vigan Cooperative Hospital, Bantay.

Naglibas ti suspek ngem simmuko met laeng iti polis a kinuyog ti maysa a barangay tanod.

Saan a narekobre ti patadem a naaramat iti pammagsol.

Idi agarup 2:50 ti malem ti Enero 15, nabagsol ni Richard Montero y Aspa, 19, baro, babaen ti kinainomna a ni Eric Montero y Pantaleon, 20, baro, agpada a residente iti Barangay Ag-agrao, ditoy nga ili.

Naammuan iti report manipud iti polis ditoy, sakbay ti pammagsol, naggiinom da dagiti dua a Montero ken dadduma a kakaduada iti maysa a kalapaw iti igid ti baybay ngem adda nabara nga argumentoda a nagresulta iti panangbagsol ti suspek iti biktima a nagsagrapan daytoy iti sugat iti makannigid a paset ti barukongna ken makannigid a takiagna.

Naitaray ni Richard Montero iti Reyes Clinic and Hospital idinto a boluntario a simmuko ni Eric Montero kadagiti nagresponde a polis.

Insuko pay ti suspek ti kitchen knife nga agatiddog iti 7.5 a pulgada kadagiti polis.

Kabayatanna, natagbat ni Apolo Gacusan y Echala, 43, naasawaan ken residente iti San Juan, Cervantes, Ilocos Sur gapu iti mapapati a panangbekkelna iti kinainomna a kalugaranna idi parbangon ti Enero 17.

Iti report manipud iti police station ti Cervantes, napan ni Eduardo Tamaken y Sepian, 49, naasawaan, iti balay ti suspek ket nagginomda agingga iti nakaturogda iti bartekda.

Nakariing ti suspek gapu iti mapapati a panangbekkel kenkuana ni Tamaken ket ginammatanna ti jungle bolo sana tinagbat ti biktima a nakasugatan ti makannigid a paset ti tengnged daytoy.

Naitaray ni Gacusan iti Bessang Pass Memorial Hospital idinto a simmuko ni Tamaken iti Cervantes police station.#