2 nabagsol, ama ti maysa biktima ti suspek

BANTAY, Ilocos Sur – Dua a lalaki ti naiyospital gapu iti pannakabagsolda a ti pay met ngarud ama ti maysa ti kangrunaan a suspek.

Nabagsol da Ernie Paguergan y Della, 25, baro, mannalon, ken ni Jonathan Cubar y Velasco, 19, baro ngem maysa a Robert Cubar, ama ni Jonathan, ti naitudo a nangbagsol kadakuada.

Iti inisial a panagimbestiga dagiti polis, adda naparnuay a di panagkinnaawatan da Paguergan ken Cubar ket nagkabilda.

Mapapati a naranaan ni Robert ti panagkabil dagiti dua ket binagsolna ni Paguergan ken iti di ammo a rason, pati ti anakna.

Naitaray dagiti dua iti Reyes Clinic and Hospital para iti pannakaagasda ngem naiyalis ni Paguergan iti St. Martin de Forres Hospital, Candon City.

Naglibas ti suspek iti saan nga ammo a direksion, kuyogna ti armasna.#