2 nagikut iti droga, paltog, naaresto iti checkpoint

SAN ILDEFONSO, Ilocos Sur – Dua a lalaki ti inaresto dagiti polis kalpasan a naduktalan nga agikutda iti maiparparit a droga ken paltog iti checkpoint nga impasdek dagiti pannakabagi ti linteg iti Candon City ken ditoy nga ili itay nabiit.

Inaresto dagiti polis ni Jovencio Eugenio Jr. y Gamata, 29, naasawaan, ken residente iti Barangay Ambucao, Santiago, Ilocos Sur kalpasan a nasukalan iti ikutna ti maysa a paltog iti checkpoint iti sanguanan ti simbaan katoliko iti Barangay San Juan ditoy siudad idi Hunio 21.

Segun iti report, pinasardeng ni Traffic Aide Jeffrey Valdez y Jainer ti lugan ni Eugenio iti sanguanan ti checkpoint gapu ta awan ti side mirror ti lugan daytoy ken saan a nakaaramat iti helmet.

Adda naipasa nga ordinansa ditoy siudad a masapul a nakahelmet ti motorista no sumrek iti Candon.

Mapapati a bayat ti pannakasitarna, saan a makaidna ni Eugenio ket natinnag ti maysa a paltog.

Mapapati a pinidut ni Eugenio ti paltog sana inkabil iti compartment ti motorsiklona ngem inayaban ti traffic aide ni Police Inspector Darwin Z. Zafra sada imbilin ti pananglukat ni Eugenio iti compartment ti luganna a nakaalaanda iti maysa a homemade cal 22 revolver nga addaan iti maysa a bala iti cylinder.

Naipaiman iti opisina ti city prosecutor ti kaso a panaglabsing iti RA 8294 maikontra ken ni Eugenio.

Inaresto met dagiti polis ni Derick John Palomares y Calantoc, 22, baro ken residente iti Barangay Iboy, ditoy nga ili idi agarup 1:50 ti malem ti Hunio 19 gapu iti panagikutna iti napagango a bulong ti marihuana.

Segun iti report, pinasardeng dagiti polis nga agisaysayangkat iti checkpoint iti asideg ti public cemetery iti Barangay Iboy para iti beripikasion ket nakitada ti agtutungraraw a transparent a plastic sachet iti bulsa ni Palomares.

Iti panagsukimat dagiti polis, naduktalanda ti lima a plastic sachet a mapapati a naglaon iti napagango a bulong ti marihuana nga agdagsen iti 15.2 grams a mapattapatta nga agbalor iti P836.00.

Napilaan ni Palomares iti opisina ti provincial prosecutor iti kaso a panagsalungasing iti Art. II ti RA 9165.#