Footer

2 nagkalap iti fish sanctuary, natiliw

CANDON CITY – Tiniliw dagiti autoridad ti dua a mangngalap a nagkalap iti fish sanctuary iti Barangay Caterman ditoy siudad idi Septiembre 6.

Nabigbig dagiti mangngalap a da Abe Ramos, 36, ken Jonathan Viloria, 27, agpada a residente iti nadakamat a barangay.

Nagresponde dagiti polis kalpasan a nakaawatda iti tawag manipud ken ni Barangay Captain Marcelino Gagarin nga adda nasiputanda nga agkalkalap iti fish sanctuary ket tiniliwda dagiti suspek.

Nakumpiska pay iti ikut dagiti dua ti iket nga inaramatda a pinagkalap.

Maprotprotektaran a lugar ti fish sanctuary ket maiparit ti agkalap ditoy.#