2 nagtagiarmas a lalaki, kinamat dagiti polis

STA. LUCIA, Ilocos Sur – Dua a lalaki a mapapati a nagpaputok sadiay Barangay Vical ditoy nga ili ti kinamat dagiti polis ngem nakalusot dagitoy.

Nupay kasta, narekobre dagiti polis ti paltog dagiti suspek iti igid ti kalsada a mapapati nga impalladaw ti back rider bayat ti panangkamat kadakuada dagiti polis.

Sakbayna, bayat ti panagpatrolia dagiti polis, nakangegda iti kanalbuong manipud iti kalsada nga agturong iti Barangay Vical.

Idi makadanon dagiti polis iti nakangeganda iti kanalbuong, dua a lalaki a nakasakay iti motorsiklo ti nakitada a sipapardas nga immadayo.

Kinamat dagiti polis dagiti suspek ket nasiputanda nga adda impalladaw ti back rider iti makannawan a paset ti kalsada.

Idi sinukimat dagiti polis no ania daytoy, maysa gayam a cal. 38 revolver nga addaan iti dua a bala ken maysa a kapsula iti uneg ti cylinder.#