2 nagudas, 2 nasugatan nagsina a pammaltog

SINAIT, Ilocos Sur – Dua a lalaki ti nagudas iti pammaltog a naisayangkat iti Barangay Paratong ditoy nga ili idinto a nalasatan ti dua ni patay iti pannakagandat ti biagda sadiay Barangay Pagsanaan, Magsingal, Ilocos Sur nga agpada a naiwayat idi rabii ti Agosto 18.

Dagus a nagudas da Jerson Salvacion Y Naida, 27, baro, mannalon, ken residente iti Barangay Ar-arusip, Badoc, Ilocos Norte; ken ni Julius Aurellano y Pagdilao, 30, naasawaan, ken residente iti Barangay Alay, Badoc, Ilocos Norte, gapu kadagiti adu a sugatda iti nadumaduma a paset ti bagida ken uloda.

Iti report manipud iti polis ditoy nga ili, adda dagiti biktima iti bassit a rangtay iti kalsada nasional a sakup ti Barangay Paratong idi pinarakapak ida dagiti di pay nabigbig a suspek idi agarup 7:50 iti dayta a rabii.

Mapapati a cal. 5.56 ti naaramat iti pammaltog kas maibatay iti 12 a naiputok a cartridge a nasarakan iti nakapasamakan ti krimen.

Nakaala dagiti inbestigador iti maysa a Nokia a selpon iti ikut ni Salvacion idinto a Myphone a selpon ti naalada ken ni Aurellano.

Awanan iti plaka ti Motoposh a motorsiklo dagiti biktima.

Nagresponde dagiti polis apaman a nakaawatda iti tawag manipud iti selpon idi agarup 8:00 iti rabii iti dayta a petsa ken nangiwayatda iti pursuit peration ngem negatibo ti resultana.

Saan a nailanad iti report no ania ti kaadda dagiti dua a sangsangaili a biktima iti rangtay iti dayta a rabii.

Saan pay met nga ammo no ania ti motibo ti pannakagudas dagiti biktima.

Kabayatanna, iti ante-mortem statement a naala dagiti polis kadagiti biktima iti pammaltog iti Magsingal, innaganda dagiti suspek a maatap a nanggandat iti biagda.

Intudo ni Benjamin Paiste a da Narding Lira ken Aldrin Alvares, kalugaranda, dagiti nangpaltog kadakuada.

Kanaig daytoy, n nangiwayat ti kapolisan iti hot pursuit operasion a nagresulta iti pannakaaresto ni Alvarez.

Agdama a sapsapulen dagiti polis ni Lira a mapapati a naglemmengen.

Iti report ti polis-Magsingal, kagapgapuda iti baybay a nagkalap ket aggawiden a nakalugan iti Honda Rebel da Benjamin Paiste y Urita, 49, ken ti kabsatna a ni Leo Paiste y Urita, 39, agpada a residente iti Barangay Pagsanaan, ngem idi makadanonda iti pagkurbaan ti kalsada a sakup ti barangayda, pinarakapak ida dagiti suspek a nagpuesto iti makin-abagatan a paset ti kalsada.

Nagsagrap dagiti agkabsat kadagiti sugat kadagiti nadumaduma a paset ti bagida ket naitarayda iti Magsingal District Hospital sada naiyalis iti Gabrtiela Silang General Hospital, Tamag, Vigan City.

Saan pay nga ammo ti paltog a naaramat agsipud iti kaawqan iti nasarakan a kapsula wenno slug iti nakapasamakan ti krimen.

Saan a nadakamat iti report no ania ti motibo ti pammaltog#