2 naipalab-og iti drug operation

MAGSINGAL, Ilocos Sur – Dua pay a drug pusher ti nairaman iti listaan ti kapolisan a natiliw nga agisaysayangkat iti illegal nga aktibidad babaen ti nagsina a buy bust operation idi Enero 26.

Idi agarup alas 8:00 ti bigat, pinalab-ogan dagiti nagtipon nga elemento ti CIDG-Ilocos Sur ken Nagbukel police station babaen ti buy bust operation ni Khalid Raganit y Asistin, 26, awanan asawa, ken residente iti Barangay Bandril ditoy nga ili ket balligi a nakakumpiskada iti masuspetsa a droga ken paraphernalia iti ikut daytoy.

Karaman kadagiti nakumpiska dagiti operatiba ken ni Raganit ti lima a heat sealed plastic sachet a nagkarga iti mapapati a shabu nga agbalor iti P6,000.00, marked money a P500.00 ken maysa a kaha ti posporo.

Kabayatanna, idi agarup 10:30 ti bigat ti nadakamat a petsa, maysa met nga operation ti insayangkat ti sabali a grupo ti kapolisan sadiay Barangay Puro, Magsingal, Ilocos Sur a nagtungpal iti pannakaaresto ti maysa a mestiso Pilipino-Amerikano.

Nakakumpiska dagiti operatiba iti ikut ni Kevin Urpiano, 36, awanan asawa ken residente iti nadakamat a barangay, iti dua a bassit a plastic sachet a naglaon iti mapapati a shabu, awan naggianna a kaha ti posporo, stainless a kitchen knife, selpon, ken ti dua a sag-P500.00 a naaramat a buy bust money.

Naipan ti suspek iti Magsingal police station para iti umisu a disposision ken dagiti nakumpiska kenkuana iti Ilocos Sur Provincial Crime Laboratory para iti pannakaamirisda.

Imminget ti panagiwayat ti kapolisan iti buy bust ken search operations kadagiti agraraira a droga ken loose firearms iti probinsia.

Nangrugi itay Enero 10 ti Comelec election gun ban ket addan nasurok a duapulo nga agikut iti expired a lisensia ti nagisuko iti paltogda tapno maidulin dagitoy iti kustodia ti kapolisan agingga iti makaalada iti permit.#