2 nakasuan iti panaglakuan iti droga

STA. LUCIA, Ilocos Sur – Dua a masuspetsa a drug pusher ti nakasuan iti panaglabsing iti RA 9165 kalpasan ti buy bust operation nga insayangkat dagiti nagtipon nga operatiba ti Sta. Lucia police station, PDEA RO1 ken PAIDSOTG sadiay Barangay Barangobong ditoy met laeng nga ili, idi bigat ti Marso 30.

Positibo ti resulta ti buy bust operation nga insayangkat dagiti nadakamat a nagtipon nga elemento kada Marion Herbert Hermoso y Festejo, 37, awanan asawa, ken residente iti nadakamat a barangay ken ni Joselito Cortez y Angala, 37, awanan asawa, ken residente iti Barangay Ronda, Sta. Lucia, Ilocos Sur.

Nakasamsam dagiti operatiba iti maysa a bassit a heat sealed sachet a mapapati a naglaon iti shabu, maysa a P500.00, ken nadumaduma a paraphernalia para iti droga a pakairamanan ti glass tooter, aluminum foil, maysa a Nokia Mobile Phone, pouch a naglaon kadagiti awan naggianda a plastic sachet, disposable lighters, ken sabsabali pay a plastic sachets a nagkarga iti residue a mapapati a droga.#