2 nangpatay iti polis, napilaan iti kaso iti korte

BANTAY, Ilocos Sur – Sagdudua a kaso ti naipila iti korte maikontra kadagiti agama a nangpaltog ken ni SPO3 Marcelino Presto, Jr. y Tugade a  puon ti nakatayanna iti ospital a nakaitarayanna.

Agpada a napilaan da Henolina Sayo y Garcia, 48, naasawaan, ken ti anakna a ni Noriel Sayo y Talania, 23, agpada a residente iti Barangay Pug-os, Cabugao iti kaso a homicide a nai-docket iti babaen ti CC No. 7504-V-2014.

Kanaig daytoy, napilaan ni Noriel Sayo y Talania iti kaso a panaglabsing iti RA 10591 babaen ti CC No. 7505-V-2014  idinto a nakasuan met ni Henolino Sayo y Garcia iti panaglabsing iti Secion 12 ti RA 9165 a nai-docket iti babaen ti 7506-V-2014.

Maipalagip a nakumpiska iti ikut ni Noriel ti cal. 45 pistol a Remington nga inaramatda a pinangpaltog ken ni Presto idinto a nakaala dagiti nagresponde a polis iti mapapati a drug paraphernalia iti ikut ti laklakay a Sayo.

Gumatgatang ni Presto iti bibingka iti The Sisters Bibingka iti Barangay Naguiddayan, Bantay, idi pinaltogan dagiti agama a Sayo a naglugan iti motorsiklo.

Nabaelan ti polis ti nakipinnaltog a puon met ti nakasugatan dagiti agama a suspek.#