2 napaltogan sadiay Narvacan, Vigan City

BANTAY, Ilocos Sur – Dua ti naireporet a nagudas iti nagsina a pammapatay a naisayangkat sadiay Vigan City ken Narvacan idi Mayo 22 ken 23.

Segun iti report a dimmanon iti Police Provincial Office, napasamak ti maysa a pammapatay idi agarup 7:25 ti sardam ti Mayo 22 sadiay Barangay San Jose, Vigan City a nakagudasan ti maysa a Joel Alibin Quines, alias Joey, 32, naasawaan, awanan panggedan, ken residente iti Barangay VI, Vigan City.

Apaman a naammuan dagiti polis ti siudad ti nasao a pammaltog, nagrespondeda a dagus ngem nadatngandan ti biktima a nakadalutaytay iti igid ti kalsada, nadigos iti bukodna a dara.

Naitaray ti biktima iti Metro Vigan Cooperative Hospital, Bantay, Ilocos Sur ngem indeklara ti attending physicial a dead on arrival.

Nagsagrap ti biktima kadagiti sugat iti nadumaduma a paset ti bagina.

Awan ti narekobre dagiti kameng ti SOCO a kapsula iti crime scene.

Iti pannakaisurat daytoy, awan pay ti suspek iti nasao a pammapatay.

Kabayatanna, sabali pay a pammaltog ti naisayangkat iti Barangay Pantoc, Narvacan, Ilocos Sur a nakagandatan ti biag ti maysa a deportee manipud iti USA ken residente met laeng iti nadakamat a barangay.

Nabigbig ti biktima a maysa a Freddie Jurado y Caparra, 59, naasawaan, deportee manipud iti USA ken residente iti nadakamat a lugar.

Limtuad iti panagimbestiga dagiti polis nga agtugtugaw ti biktima iti lauden a paset ti kalsada, agarup 15 metros manipud iti balayna idi dua a di nabigbig a suspek a naglugan iti Honda Wave motorcycle, awanan plaka, ti nangpaltog iti biktima.

Naglibas dagiti suspek iti amianan a direksion.

Immuna a naitaray ni Jurado iti Ilocos Sur District Hospital sa naiyalis iti Saint James Hospital, Vigan City.

Nakarekobre dagiti inbestigador iti innem a kapsula manipud iti cal. 45 iti nakapasamakan ti krimen.

Saan pay nga ammo ti motibo ti pammaltog.

Agtultuloy ti panagimbestiga dagiti polis mainaig iti pammaltog.

Iti sabali pay a damag, nakasuan ti maysa a Muslim gapu iti panangpaltogna iti kabsatna sadiay Muslim Compound, Zone 3, Bantay, Ilocos Sur idi rabii ti Mayo 24.

Nakasuan iti murder ni Alex Olay y Bandrang, 22, naasawaan, self-employed, gapu iti panangpaltogna iti kabsatna a ni Mujahed Olay y Bandrang, 26

Naipilan iti provincial prosecutor’s office ti kaso a maikontra ken ni Olay ket nai-docket iti babaen ti NPS number I-03-INV-15E-00285 a napetsaan May 27, 2015.#