2 napapatay iti Sta. Cruz ken Magsingal

MAGSINGAL, Ilocos Sur – Dua ti tao ti napapatay iti nagsina a pammaltog nga agpada a naisayangkat sadiay Magsingal ken Sta. Cruz, Ilocos Sur idi parbangon ti Agosto 28.

Naireport nga agpada a dagus a nagudas da Simeona Pardo y Reburon, 63, naasawaan, ken residente iti Sitio Camiring, Barangay Dacutan, Magsingal ken ni Jaime Rapada, residente iti Barangay Patpata Segundo, Candon City gapu kadagiti sinagrapda a sugat idi nadumaduma a paset ti bagida.

Segun iti report manipud iti polis-Magsingal, idi agarup 3:45 ti parbangon ti nadakamat a petsa, mapan makimisa da Pardo ken ti lakayna a ni Mario Pardo y Pascua, 43, a nakaluganda iti black Euro motorcycle ket idi agdaldaliasatda iti Sitio Linasin, Barangay Cabaroan, mapapati a pinaputokan ida ti saan a nabigbig a suspek a nagpursto iti makinlaud nga abaga ti kalsada.

Gauge 12 shotgun ti mapapati a naaramat iti pammaltog kas maibatay kadagiti uppat a kapsula ken maysa a bala iti nadakamat a kalibre iti crime scene.

Saan pay nga ammo ti motibo ti pammapatay.

Ngem segun iti kapolisan ditoy, iyun-unegda ti panagimbestigada agsipud ta awan man laeng ti dunor ti asawa ti biktima iti baet nga agwara ti bala ti shotgun no maiputok.

Sabali pay a kitkitaen dagiti polis no apay a saan a nagderetso ti asawa ti biktima a nangireport iti insidente iti police station.

Segun iti interbio ti media ken ni Pardo a naipatangatang iti DWRS, saanna a sinardengan ti asawana idi natinnag iti lugan kalpasan ti pannakapaltogda agsipud ta nangegna a nakasaanda.

Nagderetso ni Pardo a napan nagpaarayat kadagiti kapammatianna nga Iglesia ket dagitoy ti nangkuyog kenkuana a napan nagreport iti polis.

Kabayatanna, dead on the spot ni Jaime Rapada kalpasan a napapatay iti akinlaud a paset ti tiendaan publiko ti Sta. Cruz idi agarup 12:10 ti parbangon ti Agosto 28.

Agdaldaliasat ti traysikel a minaneho ni Rapada iti Bio Street, Poblaion Este ket makadanon iti nagpatinggaan iti nasemento a kalsada, kellaat a pinaltogan ti saan a nabigbig a suspek.

Pinataray ti biktima ti luganna iti bakante a lote agingga iti nakadanon iti pinagayan ket ditoy nagsasaruno manen a pinaltogan ti suspek a nakatayanna a dagas.

Nakarekobre dagiti inbestigador iti tallo a kapsula manipud iti cal. 45, 9 a kapsula manipud iti cal 5.56, maysa a lighter ken maysa a kagudua ti pakete ti Marlboro black a naglaon iti nakuppil nga aluminum foil nga addaan iti dua a plastic sachet a nagkarga iti mapapati a droga.

Agtultuloy ti panagimbestiga dagiti polis no ania ti motibo ken kinaasino ti/dagiti nangisayangkat iti pammaltog.#