2 narco-politicians nga innaganan ni Duterte a nainbolbar iti illegal a droga, dimmatag iti PRO1 director

CAMP BGEN OSCAR M FLORENDO – Boluntario a nagparang iti police regional office ditoy ti maysa a congressman ti Pangasinan ken maysa a mayor ti La Union a karaman kadagiti innaganan ni Presidente Rodrigo Duterte a nainbolbar iti illegal a droga sakbay ti naituding a deadline ti idadatagda iti kapolisan.

Boluntario a dimmatag da Congressman Jesus “Boying” Celeste ti First District ti Pangasinan ken Mayor Reynaldo Flores ti Naguilian, La Union ken ni Chief Supt. Gregorio R. Pimentel kas panagtungpalda iti waragawag ni Pres. Duterte a panagparang amin dagiti dinakamatna a nagnagan iti polis iti las-ud ti 24 nga oras.

Nagdalan iti debriefing dagiti dua nga opisial iti babaen ti nagtitipon a personnel ti  PRO1, Philippine Drug Enforcement Agency Regional Office 1 (PDEA-RO1), Criminal Investigation and Detection Unit 1 (CIDU1) ken Regional Intelligence Unit 1 (RIU1-).

Idi Agosto 7, bayat ti panagbitlana iti Camp Panacan, Davao City, imbasa ni Presidente Rodrigo Duterte ti listaan dagiti opisial iti gobierno, hues, mayor ken congressmen a kunana nga adda pannakainbolbarda iti maiparparit a droga.

Karaman kadagiti naibasa ti naganda da  Mayor Martin De Guzman ti Bauang, La Union; Mayor Dante Garcia ti Tubao, La Union; ken Mayor Reynaldo Flores ti Naguilian, La Union; dati a mayor ti Agoo Eufronio Eriguel,  ken dati a Mayor ti Bolinao, Pangasinan ngem agdama a Diputado ti Umuna a Distrito ti Pangasinan Jesus  Celeste.

Kanaig daytoy, imbilin ni Pimentel ti madagdagus a pannakaiwayat ti in-depth ken impartial nga inbestigasion mainaig iti mapapati a pannakainbolbar iti illegal a droga dagiti sumagmamano a local chief executives ken dadduma pay nga opisial ti gobierno iti rehion.

Kinuna ni  Pimentel a responsibilidad ti kapolisan ti agimbestiga tapno maammuan ti kinapudno iti likudan daytoy nga akusasion maikontra kadagiti LCEs ken dadduma nga opisial ti gobierno.  Innayonna a babaen iti inbestigasion, maikkan dagiti opisial iti gobierno iti gundaway a mangdalus ken mangsalaknib iti naganda.

Iti daytoy met laeng nga aldaw, walo nga assorted a paltog ni Congressman Celeste a pakaibilangan ti dua a shotgun, dua a 9mm pistol, maysa a cal. 45, dua nga M16 rifles ken maysa a cal. 22 ken agduduma a bala ti insuko ni Bolinao Mayor Arnold Del Fierro Celeste iti police station daytoy nga ili para iti pannakaidulinda.

Addaan amin dagiti armas iti lisensia a naiyisio idi Enero 26, 2016 ken agpaso inton Abril 20, 2020.

Kabayatanna, narelibo dagiti hepe ti polis dagiti nadakamat nga ili kas panagtungpal iti one strike policy ti PNP ken tapno malapdan ti pannakainpluensia ti maar-aramid nga inbestigasion.#