2 nasugatan idi naburang-it motorsikloda

BANTAY, Ilocos Sur – Agpada a nasugatan ti maysa a balo ken ti kasakayna idi natulid ti motorsiklo a naglugananda iti Barangay Ora West ditoy nga ili idi rabii ti Mayo 27.

Nainaganan ti biktima a ni Nemesio Patubo, 44, balo, agnaed iti nadakamat a barangay ken ti kinaluganna a ni Noralyn Pajo.

Segun iti report, agpaamianan ti XRM Honda motorcycle a minaneho ni Patubo iti barangay road a sakup ti Ora West idi dina nakontrol ti manibela ket naburang-it ti motorsiklo.

Naitaray dagiti dua iti Metro Vigan Cooperative Hospital para iti pannakaagas ti sugatda.#