CANDON CITY – Dua a lalaki ti nasugatan idi dinungpar ti naglugananda a chop-chop ti lugan a kukua ti maysa a kooperatiba ti elektrisidad iti Barangay Bagani Campo ditoy siudad.
Nasugatan da Gilbert Gacusana, residente iti Calaoaan, Candon City, nagmanejo iti chop-chop SYM, addaan plaka nga AL-2417, ken ti inluganna a ni Jeffrey Orpilla, residente iti Salvador Primero, ditoy met laeng siudad. Saan a naan-ano ni Marino Quitoriano, residente iti Sabangan, Santiago, Ilocos Sur, nagmaneho iti L300, addaan plaka XSZ-122, kukua ti Ilocos Sur Electric Cooperative.
Iti inisial nga inbestigasion ti polis, sumrek koman ti L-300 iti compound ti ISECO idi dinungpar ti lugan da Gacusana.
Nagarumiadan ken nasugatan dagiti dua iti nadumaduma a paset ti bagida.
Mapapati a nakainom iti arak ti drayber ti chop-chop.
