2 natakaw a motorsiklo, narekobre dagiti polis

CERVANTES, Ilocos Sur – Dua a motorsiklo ti narekobre dagiti polis babaen ti inwayatda nga operasion iti Sitio Lamagan, Barangay San Luis ditoy nga ili idi malem ti Hunio 25.

Nakarekobre dagiti nagtipon nga elemento ti Cervantes Police Station ken ti RHPU-COR iti maysa a nalabaga a Rusi motorcycle ken maysa a Euro motorcycle nga agpada nga awanan iti plaka iti compound ni Joe Ligunan Pisawen, residente iti nadakamat a barangay.

Mapapati a natakaw ti Rusi motorcycle iti Pico, La Trinidad, Benguet idinto a natakaw met ti Euro motorcycle iti Mankayan, Benguet.

Naipan dagiti motorsiklo iti opisina ti RHPU-COR para iti umisu a disposision.#