2 natakaw a baka, naparti

STA. CRUZ, Ilocos Sur – Dua a natakaw a baka sa naparti ti naireport a napasamak ditoy nga ili itay nabiit.

Mismo nga inreport ni Florentino Ramos y Quiming, 55, naasawaan, residente iti Barangay Suyo, Sta. Cruz, Ilocos Sur, akinkukua kadagiti dua a baka, iti kapolisan ti pannakatakaw dagiti bakana nga inwaywayna iti kataltalonan idi malem ti Oktubre 26.

Kinuna ni Ramos nga idi napanna kinita dagiti bakana iti kataltalonan idi agsapa ti Oktubre 27, awanen dagitoy iti nakaiwaywayanda ket dagiti laengen naiwarawara a naguneg ti nasarakanna.

Mapattapatta nga agpateg iti P30,000.00 dagiti natakaw a baka.

Iti napalabas, addan naireport a panagtakaw iti baka sadiay Magsingal ken San Juan sada naparti.

Iti kaso sadiay Magsingal, saanen a nagdarum ti akinkukua kalpasan a binayadan dagiti nagtakaw ti balor ti tinakaw ken pinartida a baka.#