2 natakaw motorsiklo, narekobre

CERVANTES, Ilocos Sur – Dua a motorsiklo a mapapati a nakarnap ti narekobre dagiti polis iti ikut ti dua a lalaki sadiay Barangay Comilas South ditoy nga ili idi agsapa ti Mayo 9.

Narekobre dagiti polis ti maysa a Honda 155 motorcycle, awanan plate number ken nadadael ti engine numberna manipud iti ikut ni Lol-lol Cabaot, ken sabali pay a Honda 155 motorcycle manipud ken ni Arthur Cabaot, agpada a residente iti nadakamat a barangay.

Segun ken ni Lol-lol, ginatangna ti nasao a motorsiklo iti P16,000.00 idinto a P7,000.00 ken ni Arthur kada Simon Joksi ken Tomas Pakipak, agpada a residente iti Barangay Monamon Sur, Bauko, Mt. Province.

Naduktalan ti kapolisan daytoy nga aktibidad babaen ti maysa a tawag iti selpon manipud ken ni Comilas South Barangay Captain Arthur Oliseo ken ni PSI Joel P. Lagto, COP, a nangipakaammuanna iti kaadda dagiti saan a rehistrado a motorsiklo iti barangayda.

Iti panagimbestiga dagiti polis, naammuanda a maysa met a Fredo Lagaban y Lingoy, 35, naasawaan, ken residente met laeng iti BarangayComilas South ti contact person dagiti tattao nga agitukon iti saan a nakarehistro a motorsiklo iti Cervantes.

Iti naun-uneg pay a panagpalutpot dagiti polis, naduktalanda nga adda kaso ti carnapping maikontra ken ni Joksi.

Nakikoordinar dagiti polis iti Highway Patro Group a nakabase iti Barangay Bulag, Bantay, Ilocos Sur para iti pannakaupakaammo kadagiti rehistrado nga akinkukua dagiti narekobre a motorsiklo ken iti pannakaipila iti kaso maikontra kadagiti suspek no mapudasdasan a natakaw dagiti lugan.#