2 natay, 3 nasugatan iti nagsisina a pammaltog

VIGAN CITY – Dua a tao ti nagudas idinto a dua pay ti nasugatan iti tallo a nagsisina a pammaltog a naisayang ditoy probinsia itay nabiit.

Naireport a saggaysa ti natay iti pammaltog iti Sinait ken Magsingal, idinto a tallo ti nasugatan iti pammaltog iti Vigan City iti las-ud ti lima nga aldaw.

Segun iti panagimbestiga dagiti polis Sinait, sinerrek dagiti armado a tattao ti balay ni Rodolfo Agustin, Jr. y Tangonan, 31, baro, mannalon, residente iti Barangay Sipriana, ti nadakamat nga ili idi agarup 8:45 ti bigat ti Nobiembre 14 sada pinalpaltogan ti biktima a puon ti nakatayanna a dagus.

Nakasarak dagiti inbestigador iti 13 nga empty shells ken maysa a bala manipud iti cal. 5.56, 10 a kapsula manipud iti .30 carbine ken 5 a kapsula manipud iti 9mm iti nakapasamakan ti krimen.

Iti pammaltog iti Sitio Dinumaran, Barangay Patong, Magsingal, Ilocos Sur, naammuan a napan impastor ni Basilio Battad y Ceria, 24, baro, mannalon, ti bakana idi malem ti Nobiembre 16 ngem pinalpaltogan dagiti suspek a nangpadaan kenkuana iti maysa a nasamek a paset iti abay ti waig a lumabasan ti biktima.

Natay a dagus ti biktima gapu kadagiti sugatna iti nadumaduma a paset ti bagi ken rupana.

Di pay ammo dagiti naaramat a paltog agsipud ta awan ti narekobre dagiti polis a kapsula iti nakapasamakan ti krimen.

Mapapati a love triangle ti motibo ti pammapatay.

Kabayatanna, naitaray iti Gabriela Silang General Hospital da Randolf Abigania y Arabe, 26, naasawaan; Gilbert Mendoza y Raboy, 18; ken Lolita Abigania y Arabe, balo, ina ni Randolf, agpapada a residente iti Barangay Pantay Fatima, Vigan City, para iti pannakataming dagiti sugatda iti nadumaduma a paset ti bagida kalpasan a mapapati a pinaltogan ida ni Raul Tagucos y Regua, 32, naasawaan, kalugaran dagiti biktima.

Mapapati a naaramat ditoy ti pagpaltog iti billit. Indatag met ti kapitan ti barangay ti maysa a steel pipe nga agatiddog iti 18 a pulgada ken maysa a patadem nga sumurok kumurang 2 kadapan ti kaatiddogna a mapapati a naala iti ikut dagiti biktima.#