Footer

2 natay, 7 nasugatan iti nagsina nga aksidente

NARVACAN, Ilocos Sur – Tallo nga aksidente ti nagsasaruno a napasamak ditoy itay nabiit a nakatayan ti dua a tattao ken  nakasugsugatan ti pito pay.

Iti immuna nga aksidente, mapapati a dinungpar ti Partas bus a minaneho ni Jessie Garcia, 31, naasawaan, residente iti Palali Sur, Sta. Lucia, Ilocos Sur ti maysa nga MV100 van a nakatayan ti dua a tao ken nakasugatan ti lima a naglugan iti van.

Naideklara a natay da David Cabebe ken Edgar Cabrera iti Central Ilocos District Hospital a nakaitarayanda. Karaman kadagiti nasugsugatan da Eliseo Corrales, drayber ti MV100 van, taga-Sta. Lucia, ditoy, da Delfin Dinglas, residente ti Orence, Narvacan, Ilocos Sur; Ernesto Antonio, residente ti Dasay; Erica Serra ken Lea Dio, agpada a taga-Bicol. Naglugan amin dagitoy iti van.

Segun iti inbestigasion, mapapati a simrek latta ti van iti kalsada nasional iti baet ti panagsignal ti lumabas a bus ket nupay pinadas ti bus ti naglisi, nadungparna latta ti van.

Simmuko ti drayber ti bus iti estasion ti polis ditoy.

Iti sabali nga aksidente, dinungpar ti maysa nga Elf 300 ti maysa nga army truck a puon ti nakasugatan ti drayber ti van.

Segun iti report, sumrek koma ti trak iti Barangay Camarao ditoy ket saan a nakapagpreno a dagus ti Elf a sumarsaruno kenkuana a puon ti nakadungparanna iti truck.

Nasugatan ni Eliseo Ocampo, 51, drayber ti Elf 300 van, residente ti Tangadan, San Quentin, Abra idi dinungpar ti lugan a minanehona ti akinlikud a pilid ti 6 x 6 nga army truck ti 503rd Philippine Army a nakabase iti Sulvec.

Naitaray ti drayber iti Central Ilocos District Hospital para iti pannakataming dagiti sugatna.

Kabayatanna, nadundunor ni Juanito Antolin, 58, residente iti San Pablo, ditoy met laeng nga ili kalpasan a dinungpar ti traysikel a minanehona ti kanawan a bakrang ti maysa a trailer truck.

Naammuan iti report a agpada dagiti dua a lugan nga agpaabagatan ket agparking koma ti trailer truck a minaneho ti maysa residente iti Bucay, Abra ngem saan a napakadaan ni Antolin ket nadungparna ti bakrang ti truck.

Naitaray ni Antolin iti Central Ilocos District Hospital.#