2 natay, 9 nadunor iti Region I iti iduduprak ni Bagyo Pedring

SAN FERNANDO CITY – Dua ti natay idinto a 9 ti nasugatan, iti iduduprak ni Bagyo Pedring, daytoy ti situational report manipud iti OCDRC1 itay Septiembre 29.

Nainaganan dagiti natay a da Richmond Lloyd Orbinar, 7, agnaed iti Barangay Bitalag, Bacnotan, La Union ken ni Maricel Bustamante, 28, agnaed iti Barangay Sioasio East, Sual, Pangasinan.

Natupakan ni Orbinar iti kongkreto maigapu iti napuri a kayo ti mangga bayat ti kaaddana iti uneg ti balayda idinto a natupakan ni Bustamante iti mangga bayat ti kaaddana met iti uneg ti balayda.

Kas maibatay ti report ti OCDRC1, siam ti nadunor iti bagyo a pakairamanan ni April Garcia, 11, residente itiĀ  Barangay Santa Rita West, Aringay, La Union (nakoriente); Jean Orbinar, 6, taga-Barangay Bitalag, Bacnotan, La Union (natupakan ti kayo); Violeta Ogbinar, 55, taga-Bitalag, Bacnotan, La Union (natupakan iti debris);Ā  Jennelyn Mamaril, 9, taga-Poro Point, San Fernando City (nakabaddek iti nabtak a sarming); Florencia Sumalde, 57, taga-Poblacion, San Gabriel, La Union (napuntaan ti mugingna iti natnag a sarming);Ā  Ely Sena, 28, taga-Barangay Polo, Alaminos City, Pangasinan (natupakan iti akasia bayat a nakabisikleta); Roel Jimenez, 37, taga-Polo, Alaminos City, Pangasinan (naaprasan iti natuang nga akasia); Johnny Eden Torio, 42, taga-Barangay Coral, Mapandan, PangasinanĀ  (napuntaan iti galvanized iron); ken Darwin Bustamante, 29, agnaed iti Barangay Sioasio East, Sual, Pangasinan.

Kas maibatay iti report ti OCDRC1, agdagup iti nasurok nga 11,000 a pamilia wenno 52,791 a tattao ti naapektaran iti pannakalayus ti 159 a barangay iti 27 a munisipalidad iti tallo a probinsia tiĀ  Region I.

Iti report ti OCDRC1, agdagup iti 529 dagiti balay a nadadael iti La Union,Ā Ā  Pangasinan ken iti Ilocos Sur gapu iti layus ken storm surge.

Iti Ilocos Sur, 2 a barangay ti naireport a nalayus a nakaapektaran ti 23 a pamilia wenno 115 a tattao; iti La Union, 49 a barangay ti nalayus a nakaapektaran ti 1,687 a pamilia wenno 8,033 a residente; ken iti Pangasinan, 108 dagiti barangay a nalayus a nakaapektaran ti 7,317 a pamilia wenno 44,643 nga agnaed.

Mapattapatta met nga agdagup iti P93,141,608 ti nadadael iti agrikultura ken inprastruktura.

Mabalin a ngumatngato pay ti pateg dagiti nadadael no mapasangpet ti kumpleto a report manipud kadagiti naapektaran a probinsia ditoy rehion.#