2 natay idi naikras ti motorsikloda

SANTA, Ilocos Sur – Natay ti maysa a seaman ken ti kinasakayna gapu iti pannakaikras ti motorsikloda iti national highway a sakup ti Barangay Magsaysay ditoy nga ili idi malem ti Agosto 17.

Natay a dagus ni Aries Quirino y Tugade, 31, naasawaan, seaman, ken residente iti Barangay Callaguip, Caoayan, Ilocos Sur idi mapapati a naigalis ti minanehona a motorsiklo a Yamaha Monocross Midship a puon ti nakaipalladawanda ken ti kinasakayna a ni Henry Galinato y Collado, 38, baro, ken kalugaranna met laeng.

Naideklara met nga awanen ti biag ni Galinato idi maidanon iti Metro Vigan Cooperative Hospital.

Segun iti inbestigasion, agpaabagatan ti motorsiklo ket idi makalabasda iti nagkurba a kalsada iti Barangay Magsaysay, napukaw ni Quirino ti kontrolna iti luganna gapu iti nagalis a kalsada a puon ti nakaikrasan ti motorsiklo ken nakaipalladawanda ken ni Galinato iti nauneg a kanal.#