2 natay iti aksidente ti lugan

CAMP ELPIDIO QUIRINO, BANTAY, Ilocos Sur – Dua a tao ti nagudas gapu iti nagsaruno nga aksidente iti lugan iti Narvacan ken Cervantes idi rabii ti Pebrero 24 ken 25.

Iti report a dimmanon iti Provincial Police Office ditoy, natay da Jojo Cabanilla, residente iti Barangay Rivadavia, Narvacan, Ilocos Sur iti aksidente iti lugan idi agarup 11:20 ti rabii ti Pebrero 24 iti national highway a sakup ti Barangay Lungog iti nasao met laeng nga ili ken ni Cerenio Sanchez y Orig, 40, naasawaan, residente iti Barangay Rosario, Cervantes, Ilocos Sur bayat ti panagdaliasatna a nakalugan iti motorsiklo iti Cervantes-Tagudin road iti Sitio Tamaang, Barangay San Juan, Cervantes.

Naideklara ni Cabanilla a dead on arrival iti Narvacan Central Ilocos Sur District Hospital kalpasan a naikras ti nakilugananna a motorsiklo a minaneho ni Ednolie Ulbaken y Gobing (ODU), awanan lisensia ken residente iti Poblacion, Lagangilang, Abra.

Iti panagimbestiga dagiti polis, agpaamianan a direksion ti Honda XRM a minaneho ni Ulbaken ngem iti panang-oberteykna iti maysa a motorsiklo iti pagkurbaan, naikras iti akinlaud nga abaga ti kalsada.

Naitaray ti drayber ken ti backrider a ni Cabanilla iti Narvacan Central Ilocos Sur District Hospital ngem awanen ti biag ni Cabanilla idi naidanon iti balay pagagasan.

Naitaray met ni Sanchez iti Bessang Pass Memorial Hospital, Cervantes, Ilocos Sur sa naiyalis iti Ilocos Training Regional Medical Center, San Fernando City, La Union ngem pimmusay idi agarup 11:45 iti Pebrero 25.

Agpalaud a direksion ti motorsiklo a minaneho ni Sanchez idi aksidente a dinungparna ti poste ti elektrisidad a nagsagrapanna kadagiti dunor iti nadumaduma a paset ti bagina ken iti ulona ken puon iti nakatayanna iti ospital a nakaitarayanna.#