2 natay iti aksidente ti lugan iti Candon City, San Ildefonso

BANTAY, Ilocos Sur – Dua ti natay idinto a maysa ti nadundunor gapu iti aksidente a napasamak iti dua nga ili idi Disiembre 17 ken Disiembre 20.

Natay da Jayson Guistoc y Tong-alan, 26, baro, residente iti Alfonso, Del Pilar, Ilocos Sur ken ni Jojo Jovita y Tayaba, 35, ken residente iti Barangay Guimod Sur, San Juan, Ilocos Sur, gapu kadagiti sinagrapda a sugat maigapu iti pannakainbolbar ti luganda iti nagsina nga aksidente.

Segun iti report a dimmanon iti provincial police office ditoy, napasamak ti aksidente a nakatayan ni Guistoc idi alasĀ  6:00 ti bigat ti Disiembre 17 iti kalsada iti Darapidap Beach Resort.

Naammuan iti inisial nga inbestigasion nga agpadaya ti XRM Honda motorcycle a minaneho ni Guistoc idi nagbaribar ti luganna iti makannawan ket saan a nakontrol ti biktima ti manibela a puon ti nangdungparan ti luganna iti puon ti nyog iti makin-abagatan a paset ti kalsada.

Naitaray iti St. Martin De Porres Hospital da Guistoc ken ti inliabarna a ni Rex OrdoƱes y Bandalog, 22, baro, residente met laeng iti Alfonso, Del Pilar ngem naideklara ni
Guistoc a dead on arrival.

Naammuan pay iti inbestigasion nga adda iti inpluensia ti arak dagiti dua ken awan ti helmetda.

Kabayatanna, pimmusay bayat ti pannakatamingna iti ospital ni Jojo Jovita y Tayaba, 35, ken residente iti Barangay Guimod, San Juan, Ilocos Sur kalpasan a nainbolbar ti luganna iti aksidenteĀ  iti national highway a sakup ti Barangay Poblacion East, iti sanguanan ti tower 54 gasoline station iti San Ildefonso, Ilocos Sur idi sardam ti Disiembre 20.

Iti panagimbestiga dagiti polis, agpaabagatan a direksion ti Suzuki multicab a minaneho ni Warren Tadena y Tabulinar, 32, naasawaan, ken residente iti Barangay Puro, Magsingal, Ilocos Sur, ket agpakannigid koma nga apan iti gasoline station idi mapapati a dinungpar ti napaspas ti tarayna a motorsiklo a minaneho ti biktima.

Gapu iti pigsa ti impact, nagsagrap ti biktima kadagiti sugat iti nadumaduma a paset ti bagina ket pimmusay iti Metro Vigan Cooperative Hospital a nakaitarayanna.

Saan a naan-ano ti drayber ti multicab.#