SANTIAGO, Ilocos Sur. Natay nga insigida ti dua a lalaki idi nakidinungpar ti motorsikloda iti maysa a bus iti barangay Bigbiga iti daytoy nga ili.
Natay a dagus da Florante Eleccion, addaan naan-anay nga edad, ken ni Rolly Vidal y Cabanot, agpada a residente iti barangay Poblacion, San Esteban Ilocos Sur kalpasan a nakidinnungpar ti XRM a luganda iti Partas Bus, addaan plaka NXU-625, ken minaneho ni Gene Gacutan, 39, residente iti barangay Aggay, Bantay, Ilocos Sur.
Segun ti inbestigasion ti polis, agturturong iti amianan a direksion ti XRM a nagluganan dagiti biktima ket iti panagkurbada iti national highway a sakup ti Barangay Bigbiga, mapapati a nakakautda iti bangir a linia ket dida naliklikan ti makasabatda a bus a nagtungpal iti panagdinungparda.
Pirmi a nadadael ti motorsiklo dagiti biktima. Naaddaan met iti perdi ti sungo ti Partas. #