Footer

2 natay iti nagsina a pammaltog

STO. DOMINGO, Ilocos Sur – Dua a lalaki ti napapatay iti nagsina a pammaltog iti San Juan ken ditoy nga ili idi Pebrero 21 ken 20.

Agpada a dagus a natay da Zacarias Viloria y Arellano, 46, naasawaan, barangay kagawad, agpaspasada iti traysikel, ken residente iti Barangay Saoang, San Juan ken ni Julius Teblatin Caypuno, 41, naasawaan, taga-Barangay Lapat, Sto. Nino, Cagayan ngem agdama nga agnaed iti Sitio Tabug, Barangay Vacunero ditoy nga ili kalpasan a pinaltogan ida dagiti armado a tattao iti saan pay ammo a rason.

Iti pammaltog iti San Juan a napasamak iti agarup alas 6:00 ti agsapa, agpaamianan a direksion ti traysikel a nagluganan ni Viloria ken ni Luzviminda Corpuz y Tindoc, 40, naasawaan, residente met laeng iti nadakamat a barangay, ket idi makadanonda iti Barangay Guimod, immabay dagiti nangsurot kadakuada a suspek a naglugan iti motorsiklo sada pinaltogan ti biktima iti sumagmamano a daras a nakapuntaan ti nadumaduma a paset ti bagina a puon ti dagus nga ipapatayna.

Kabayatanna, mapapati nga imon ti nakagapu  iti pammapatay iti Barangay Poblacion ditoy nga ili idi agarup 6:50 ti malem ti Pebrero 20.

Limtuad iti inisial nga inbestigasion dagiti polis a sakbay ti pammaltog, dimmagas ti biktima iti BJ Store ket mapapati a nakipagkankanta iti videoke a kaduana dagiti dua a babbai a nabigbig a da Irene Tabangcura y Ballesteros, 37, separada, taga-Barangay Pacifico, Ilocos Norte ken Mely Tubon y Ramos, 52, naasawaan, residente iti Barangay Parada, ditoy met la nga ili.

Madama ti panagkakanta dagiti babbai idi immasideg ti suspek sana pinaltogan ti ulo ti biktima a puon ti nakatayanna a sigida.

Dagus a nangisayangkat dagiti polis iti pursuit operation ket inarestoda ni Raymund Sapla y Saniatan, 49, welder ti Freblex Construction ken residente ti Namruangan, Cabugao, Ilocos Sur.

Nakumpiska dagiti polis iti ikutna ti maysa a cal .45 pistol Armscor nga addaan iti magasin a naglaon iti 7 a bala.

Limtuad iti panagpalutpot dagiti polis a kalib-in ti suspek ni Tabangcura.#