Footer

2 natay iti pammaltog iti Cabugao

BANTAY, Ilocos Sur – Iti baet ti kampania ti kapolisan maikontra iti panagraira ti paltog ditoy probinsia, dua manen ti natay iti nagsisina a pammaltog a naisayangkat ditoy nga ili ken iti Sinait itay nabiit.

Iti report a dimmanon iti police provincial office ditoy,  napaltogan a puon ti ipapatayda da Roger Riguenos y Martinez, 35, naasawaan, mannalon ken residente iti Sitio Baliw, Barangay, Quezon, Cabugao; ken Eufemio Tabin y Tabulog, 42, naasawaan, mannalon ken residente iti Barangay Pila, Cabugao.

Saan a panagkinnaawatan ti mapapati a nagramutan dagiti dua a pammaltog a nakaigapuan ti pannakatay dagiti biktima.

Segun iti report, nagsubang da Riguenos ken ti suspek a ni Marlon Cabasa y Dalo, 36, baro, ken kalugaran met laeng ti biktima bayat ti panaggiinomda iti likud ti balay ti suspek idi sardam ti Hulio 16 a puon ti nangpaltogan ti suspek iti biktima.

Naitaray ni Riguenos iti Pira Clinic and Hospital ngem indeklara ti doktor nga awanen ti biagna.

Saan a narekobre dagiti nagresponde a polis ti paltog a naaramat iti pammapatay.

Mapapati a susik met laeng ti motibo ti panangpaltog ni Joel Quibilan y Vivit, 25, baro, barangay tanod ken residente iti Barangay Bonifacio, Cabugao ken ni Tabin idi agarup alas 9:55 ti rabii ti Hulio 18.

Segun iti inbestigasion, napan nagginom ni Tabin iti Hillside Videoke and Restaurant a masarakan iti Barangay Cuancabal, Cabugao ket mapapati a nagsubangda iti suspek iti ruar ti nasao a bar a puon ti nangpaltogan ti barangay tanod kenkuana iti namindua a daras.

Awanen ti biag ni Tabin a naidanon iti Pira Clinic and Hospital gapu iti nasagrapna a sugat iti tian ken ulo.

Inaresto dagiti polis ti suspek ngem dida narekobre ti paltog a naaramat iti pammapatay.

Naipilan ti kaso a murder maikontra iti suspek iti provincial prosecutor’s office iti Vigan City.#