2 natay iti pammaltog iti New Year’s celebration

BANTAY, Ilocos Sur – Nagudas ti maysa a barangay tanod ken maysa a baro iti nagsina nga insidente ti pammaltog iti Siudad ti Vigan ken ditoy nga ili bayat ti selebrasion iti baro a tawen.

Segun iti report a dimmanon iti provincial police office, napasamak ti maysa a shooting incident sadiay Barangay Apatot, San Esteban, Ilocos Sur idi agarup 10:15 ti rabii ti Disiembre 31 a nakapaltogan ni Rodolfo Eligio, Sr. y Dayap, 50, naasawaan, barangay tanod, Bantay Dagat, mangngalap, ken ni Reynold Eligio Eligio, 28, naasawaan, mangngalap.
Iti inisial a panagimbestiga dagiti nagresponde a polis, madama ti panaggiinom dagiti biktima, kaduada ni Randy Vallejo y Dela Cruz, 26, baro, laborer, iti balay ni Arjay Eligio, anak ni Rodolfo, idi pinaputokan ida dagiti armado a tattao a nagpuesto iti asideg ti ridaw a sumrekan iti balay ken iti tawa iti amianan a paset ti balay.

Naglibas dagiti di nabigbig a suspek iti saan nga ammo a direksion kalpasan ti pammaltog.

Gapu iti grabe a sinagrapna a sugat iti nadumaduma a paset ti bagina, dagus a natay ni Rodolfo Eligio.

Naitaray met ni Reynold iti Candon City Hospital para iti pannakaagas dagiti sugatna.

Narekobre iti crime scene ti maysa a bala para iti 9mm, maysa a kapsula para 9mm ken kapsula manipud iti cal. 45.

Naipan ti biktima iti Joces Funeral Homes, Candon City, para iti pannakaautopsiana.

Di pay ammo ti motibo ti pammapatay.

Iti pannakaisurat daytoy, agtultuloy ti panagimbestiga dagiti polis mainaig iti daytoy a shooting incident.

Kabayatanna, naideklara a dead on arrival ni Arnel Gascon y Bandico, 34, baro, ken residente iti Barangay Capangpangan, Vigan City idi maidanon iti St. James Hospital, Vigan City gapu iti pannakapaltogna bayat ti panangselebrarda iti baro a tawen iti Shelterville, Barangay San Julian Norte, Vigan City idi agarup 2:50 ti bigat ti Enero 1.

Nabigbig ti pimmaltog kenkuana a ni Ryan Rafanan y Aporongao, baro, ken residente iti Barangay IV, Vigan City.

Segun iti inisial a panagimbestiga dagiti polis, madama ti drinking session ti biktima, suspek ken dagiti sumagmamano a gagayyemda idi kellaat nga inasitgan ni Rafanan ni Gascon sana pinaputokan iti namitlo a beses.

Intaray ni Samuel Tapalgo y Pasion, 31, naasawaan, ken residente iti nadakamat a lugar, ti biktima ngem saanen a naiyabut pay ti biagna.