2 natay iti panagdinnungpar kotse ken motorsiklo

CANDON CITY – Dua ti natay iti aksidente a nakainbolbaran ti maysa a kotse ken motorsiklo iti national highway a sakup ti Barangay Tablac ditoy siudadĀ  iti sardam ti Mayo 4.

Saanen a naiyabot ti biag da Ryan Barroga, 27, naasawaan, ken residente iti Barangay Patpata 2nd, Candon City, ken ni Rogelio Gadiano y Betantes, 37, baro, ken residente iti Barangay Balingaoan, Candon City.

Segun ken ni Rogelio Escopel y Igalla, 52, naasawaan, ken residente iti 108 Fontanilla, Paing, Bantay, Ilocos Sur, nagmaneho iti Toyota Innova, agpaamianan ti luganna idi makitana ti kasinnabatna aĀ  awan silawna a motorsiklo a minaneho ni Barroga a nang-obertek iti maysa a Forward Truck ken nakidinnungpar iti kotsena.

Gapu iti pigsa ti pannungpar, naipuruak iti laud nga abaga ti kalsada da Barroga ken dagiti kalubbonna a da Betantes ken maysa a Christian Gabor Peralta, baro, ken residente iti Barangay Patpata 2nd, Candon City.

Nabtak ti makannigid a sango a pilid ti kotse ken nadadael ti sungo ti lugar idinto a nakaro ti dadael ti motorsiklo.

Intaray dagiti nagresponde a polis dagiti naglugan iti motorsiklo iti Candon General Hospital ngem naideklara a dead on arrival da Barroga ken Gadiano gapu iti nakaro a sugatda iti ulo ken paset ti bagida.

Nagsagrap met ni Gabor iti sugat iti paset ti bagina.

Segun iti polis, positibo iti alkohol ni Gabor.#