2 natay iti panagdinnungpar ti motorsiklo, traysikel

NARVACAN, Ilocos Sur – Natay ti maysa a motorista ken ti drayber ti traysikel gapu iti panagdinnungpar dagitiĀ  luganda iti national highway a sakup ti Barangay Quinmarayan ditoy nga ili idi lawasna.

Natay a dagus kalpasan ti pannungpar ni Michael Alden Vizcarra y Dameg, 16, baro, ken residente iti Barangay Lungog ditoy nga ili idinto a pimmusay bayat ti pannakatamingna iti Central Ilocos District Hospital a nakaitarayanna ni Carmelo Valeros y Tadeo, 49, naasawaan, ken residente iti Maoay, Bangued, Abra.

Segun iti inisial nga inbestigasion, mapapati nga nag-obertek ni Vizcarra ket dina nasigudan a kasinnabatna gayam ti Maton tricycle a minaneho ni Valeros a nagresulta iti panagdinnungparda ken dagus a nakatayan ni Vizcarra.

Natukkol ti kannigid a saka ti backrider ni Vizcarra a ni Edgar Silva, 19, baro, idinto a nadunor met dagiti pasahero ni Valeros a da Mark Cris Valeros ken Marilou Valeros.

Mapapati nga awan ti headlight ti motorsiklo ti biktima ken saan a nakaaruat iti helmet.#