Footer

2, natay, upland municipalities nalakon, iti ilalasat ni Bagyo Igme

VIGAN CITY – Dua ti naipadamag a natay idinto a saan a makalasat dagiti lugan gapu iti reggaay iti sumagmamano nga upland municipalities ditoy iti ilalabas ni Bagyo Igme itay napan a lawas.

Kinuna ni Vice Governor Jerry Singson nga iti panagmonitor ti opisinana, dua a tao ti nalmes iti Sta. Maria, Ilocos Sur gapu ta naiyanudda iti agus ti karayan idinto a sumagmamano nga ili iti upland ti nalakon gapu kadagiti landslide a pakairamanan ti Quirino-Cervantes road, Suyo-Cervantes road, del Pilar, ken San Emilio.

Nalmes da Rogelio Racca y Viloria, 40, residente iti Maynganay, Sta. Maria, Ilocos Sur ken Eric de la Cruz, 25, kalugaranna, gapu iti pannakaiyanudda idi bimmallasiwda iti karayan tapno mapanda agala iti uong.

 Narekobre ti bangkay ni Viloria iti Nagsayaoan idinto nga iti asideg ti rangtay ti Maynganay ken ni de la Cruz.

Nupay kasta, kinuna ti bise gobernador nga awan ti nasagrap a dadael dagiti mula ken pagtaengan iti Candon City, Salcedo, Sinait, Vigan City, ken dadduma pay nga ili iti patad.

Ngem sumagmamano a balay  ken bilog ti dinadael ti alipugpog iti Fuerte, Caoayan ken iti Sto.Domingo, segun iti namonitor ti bise gobernador.

Iti Barangay Fuerte, iti agarup alas siete ti bigat ti Hulio 28, intayab ti alipugpog ti atep ti dua a balay idinto a dinurudorna dagiti bilog a nakadadaelan dagiti pasaplakda.

Segun iti maysa nga agnaed, madamada nga agal-ala kadagiti naidaknir a kayo iti igid ti baybay idi nakitada ti “agtayyek nga angin, kasla adda apuyna nga agdarang” a nangsalapon kadagiti nasao a balbalay.

Nupay kasta, saan a naan-ano dagiti agnaed dagiti balay a dinalupos ti alipugpog.

Iti met Sto. Domingo, kinuna ni Singson a tallo a balay ti naitayab ti tuktokda ken adda pay dagiti mangga a naiburang-it gapu iti allawig a limmasat.

Innayonna nga iti met Del Pilar, maysa a dyip a para pasahero ti tinulid ti napegges nga agus gapu iti panangipilit ti drayber a lumasat iti karayan.

Nupay kasta, nakaballasiw dagiti pasahero nga awan ti naan-ano kadakuada.

Ketdi, adda met dagiti naparaburan iti bagyo kas iti Galimuyod nga agur-uray iti tudo tapno makaraep dagiti mannalon, segun iti bise gobernador.#