2 natiliw agkolkolekta iti pusta

NARVACAN, Ilocos Sur – Dua a lalaki ti tiniliw dagiti polis bayat ti panagkolektada iti pusta sadiay Barangay Lungog idi Mayo 9.

Nainaganan dagiti agpatpataya iti illegal a numbers game a jai alai a da Alexander Caberto y Fariñas, 47, residente iti Barangay San Antonio ken ni Buenaventura Fernandez y Saldua, 42, residente iti Barangay Parparia.

Nakumpiska iti ikut dagiti dua dagiti papelitos a nakaimarkaan ti Meridian Vista Gaming Corporation a nakaisuratan dagiti kumbinasion ti numero ken pustada, P625 a bet money ken ball pen.

Naipila ti kaso a pangsalungasing iti PD 1602 kas inamendaran ti RA 9287 maikontra kadagiti suspek a nai-docket iti babaen ti NPS No. I-03-INQ-14E-00083 dated 9 May 2014.#