2 natiliw iti buy bust operation, nakasuan

STA. CRUZ, Ilocos Sur – Napilaan iti kaso ti dua a tao a natiliw iti buy bust operation sadiay Barangay Lantag, ditoy nga ili idi malem ti Oktubre 26.

Napilaan iti kaso a panaglabsing iti RA 9165 da Robert Lagmay ken Gina Valdez iti opisina ti Provincial Prosecutor’s Office, Vigan City, a nai-docket iti babaen ti NPS number I-03-INQ-145-00188.

Maipalagip a natiliw da Lagmay, 37, awanan asawa, ken Valdez, 33, awanan asawa, agpada a residente iti Barangay Poblacion Este, Sta. Cruz babaen ti buy bust operation nga insayangkat ti Sta. Cruz Police Station babaen ti panangidaulo ni PCI Simeon Gawec Damolkis idi agarup 5:30 ti malem ti Oktubre 26.

Nakumpiska iti ikut dagiti dua ti maysa a dakkel a heat sealed plastic sachet a naglaon iti tallo a babassit a sachet a nagkarga iti mapapati a shabu, tallo a sag-P1,000.00 a marked money, maysa a P500.00 ken dua a sag-100.00, motorsiklo, selpon, tulbek ken DVD disk.#