2 natiliw iti drug operation, imbilin ti korte a maibalud

ALILEM, Ilocos Sur – Mamati ti kapolisan ditoy a napungtildan ti ima dagiti aglaklako iti maiparparit a droga iti pannakaikursong iti pagbaludan dagiti dua a natiliw iti drug operation idi Abril 24.

Itay Abril 28, naiyalis iti BJMP, Tagudin, Ilocos Sur da William Estrada y Bantoag ken Anton Sagong y Bantiao babaen iti commitment order nga inyisio ni Judge Anacleto M. Bañez ti Regional Trial Court, Branch 25, Tagudin.

Nakasuan da Bantaoag ken Sagong iti panaglabsing iti Section 11 Article II ti R.A. 9165 ket nai-docket dagitoy iti babaen ti Criminal Case No. 1426 ken 1427.

Iti sabali a bangir, temporario a nadismis ti kaso ni Dexter E. Abansi gapu ta menor de edad ket naipaima iti MSWDO, Bakun, Benguet babaen ken ni Leticia C. Laleo.

Idi agsapa ti Abril 24, nangipasdek ti polis-Alilem iti checkpoint iti Brown Street, Poblacion kalpasan a nakaawatda iti impormasion babaen iti impasdekda a barangay intelligence network (BIN) nga adda maipuslit a marihuana a naikarga iti maysa a passenger jeepney a naggapu iti Kayapa, Bakun, Benguet.

Iti agarup 8:15 ti bigat ti nadakamat a petsa, nasaripatpatan dagiti polis ti passenger jeepney a minaneho ti maysa nga Ernesto Das-ilen y Saliw-a, a naggapu iti daya.
Pinasardeng dagiti polis ti dyipni gapu iti panaglabsing iti ordinansa nga overloading gapu ta adda kargana ken pasaherona iti tuktok.

Iti panagsukimat dagiti polis iti passenger jeep, nasukalanda dagiti bricks ti marihuana iti dua a karton a naikarga iti tuktok ti dyip ken nagtugawan dagiti dua a lalaki nga idi agangay ket nabigbig nga isuda Anton Sagong y Bantiao, 18, baro, ken Dexter Bantiao y Abansi, 15, baro, ken agpada a residente iti Barangay Kayapa, Bakun, Benguet.

Sabali pay ti nasukalanda a marihuana a naikarga iti dua a karton iti uneg ti behikulo a mapapati a kukua ti maysa a William Estrada y Bantaoag, 35, ken residente met laeng iti Kayapa, Bakun, Benguet.

Naiwayat ti panagsukimat kadagiti kargamento iti sanguanan dagiti dua a barangay kapitan, opisial ti DILG ken pannakabagi ti korte munisipal.

Agdagsen amin iti 36 kilos dagiti mapapati a marijuana fruiting tops a nakumpiska dagiti polis.

Naipan dagiti nakumpiska a droga iti Regional Crime Lab para iti pannakaamirisda.

Iti kallabes, masansan ti panangraut ti kapolisan dagiti plantasion ti marihuana iti nagbeddengan ti Ilocos Sur ken Benguet, no sadino a mapag-ot ken mapuoran dagiti minilion ti pategda a mula a marihuana.#