2 natiliw nga illegal nga agkalkalap

SAN ESTEBAN, Ilocos Sur – Dua a mangngalap ti inaresto dagiti polis idi rabii ti Abril 7 gapu iti illegal a panagkalapda iti kabaybayan a sakup ti Barangay Bateria ditoy nga ili.

Tiniliw ti nagtipon a grupo ti polis ditoy nga ili ken ti Philippine Army nga indauluan ni PI Nestor Savellano ken iti overall a superbision ni PI Joel Castillo, ACOP, da Samuel Cruz y Rapanut, 54, akinkukua iti motorized a bangka ken Patricio Diego y Costales, 42, agpada a residente iti Barangay Lingsat, Sta. Maria, Ilocos Sur ken kinumpiskada dagiti sumurok kumurang tallo kilo a a nakalapanda a nagduduma a lames, maysa a pana, 2 rolio a hose, 2 nga improvised pin a kayo, gaud, maskara, ti motorized a bangka ken ti inusarda a compressor.

Nagresponde dagiti pannakabagi ti linteg kalpasan a nakaawat ti police station iti tawag iti radio manipud ken ni Abner Ramirez, nakaduty a Bantay Dagat ken residente iti nadakamat a barangay nga adda nakitana nga agkalkalap iti kabaybayan daytoy.

Masansan a taga-Barangay Lingsat, Sta. Maria dagiti matiltiliw nga illegal nga agkalkalap iti kabaybayan ti San Esteban.#