Footer

2 OFW tinulongan ti gobierno probinsial a makaawid

VIGAN CITY – Dua nga overseas Filipino workers ti tinulongan ti gobierno probinsial a makaawid ditoy pagilian kalpasan a nagkaproblemada mainaig iti trabahoda iti ballasiw-taaw.

Nakaawid met laeng iti denna dagiti pamiliada da Luis Masing, taga-Vigan City ken ni   Ednalyn Cardenas, taga-Mabilbila, Santa, Ilocos Sur  babaen ti pannakikoordinar ti opisina ni Gov. Luis “Chavit” Singson kadagiti maseknan nga ahensia ti turay ken embahada ti Pilipinas kadagiti naggapuanda a pagilian.

Nagtrabaho ni Masing iti uppat a tawen a kas fiber optic technician iti Saudi Arabia  idinto a katulongan ti nastrek a trabaho ni Cardenas iti Egypt.

Nangrugi ti problema ni Masing idi aglusulos iti kompania a pagtrahabuanna tapno umalis iti sabali a kompania agsipud ta masansan a naladaw a maited ti sueldona.

“Pasaray abuten ti lima agingga iti innem a bulan sakbay nga itedda ti sueldomi. Nadagsen kaniak daydiay ta kasapulan unay dagiti annakko nga agbasbasa ti kuarta,” kinuna ni Masing.

Ngem nupay inaprobaran ti kompania ti panagikkatna, re-entry ti intatakda iti bisa ni Masing imbes a final exit ket saan a makapagaplikar daytoy iti sabali a kompania iti Saudi.

Inrupirna ti kasona iti  Labor Department ti Saudi ken nagpatulong iti embahada ti Pilipinas ngem naglabas ti sumagmamano a bulan nga awan ti aksion dagitoy, malaksid ti saan a pannakaited ti kompleto a sueldona.

“Awan ti ub-ubraen ti embahada ti Pilipinas sadiay tapno matulongan dagiti OFW isu a napanunotko ti agpatulong ken ni Gov. Luis “Chavit” Singson ket agyamanak ta dagus a naaksionan ti kasok ken nasukatan iti final exit ti naitatak iti bisak,” innayon pay ti OFW.

Kabayatanna, iti Egypt ti nakaipatulodan ni Cardenas imbes nga ti Jordan  kas  inkari ti nangrekrut kenkuana iti Pilipinas.

Segun ken ni Cardenas, napadasanna ti namaltrato babaen ti amona. Malaksid iti pisikal a panangpasakit, saan pay a naited ti umno a sueldona, malaksid pay nga inkaltasda kenkuana ti bayad dagiti alikamen a mabtak wenno madadaelna.

Kalpasan ti nasurok dua a tawen a panagan-anusna, inkeddeng ni Cardenas ti agpatulong tapno makaawid iti Ilocos Sur.

Nagpatulong ni Eufresina nga inana ken ikitna a ni Delia iti opisina ti gobernador ket dagus a naiproseso dagiti kasapulan a dokumento iti panagawidna.

Kayat ni Cardenas a mabayadan koma dagiti sueldo a saanna a naala tapno adda pangrugianna namen.

Nupay kasta, agpada da Masing ken Cardenas a saan a nangirikep iti posibilidad ti panagtrabahoda manen iti sabali a pagilian iti laksid ti saan a nasayaat a nagpasaranda kas OFW.#