Footer

2 ordinansa mainaig truck, motorsiklo nga agdaliasat iti siudad, maad-adal

VIGAN CITY – Dua nga ordinansa pakaseknan dagiti delivery truck ken motorsiklo nga agdaliasat ditoy siudad ti maad-adal iti konseho.

Nangipila ni Konsehal Hermenigildo Apelin iti ordinansa a basbassit dagiti delivery truck a sumrek kadagiti kalsada a sakup ti Heritage Village agsipud ta maapektaran dagiti kadaanan a balbalay ken masalaponda dagiti barut ti elektrisidad ken telepono.

Singasing ni Apelin a manipud iti 4 metro, agbalin laengen a 3.6 metro ti kadakkel ti truck.

Iti report ti komite ti transportasion nga idauluan ni Konsehal Everin Molina, P500 multa ti agsalungasing iti ordinansa ket ma-impound ti lugan iti Vigan City motorpool.

Kinuna met ni Engr. Bong Donato, presidente ti Save Vigan Ancestral Homes Association, Inc. (SVAHAI) a kasapulan a maikkat dagiti delivery trucks ken generator iti paset ti Plaridel street ta makadadaelda iti buya.

Kinuna ni SPO4 Edwin Arde, pangulo ti City traffic division, a mangdesignar iti traffic aide nga agbantay iti nasao a lugar.

Naidawat pay nga adda maikabil a traffic signages iti sumrekan ti Plaridel St. a paset ti Girl Scout building ken mairaman iti ordinansa a maiparit ti overnight parking dagiti delivery trucks ken Elf tapno maprotehiran ti Heritage Village ken saan a marigatan nga agresponde dagiti bumbero no adda mapasamak nga uram.

Kabayatanna, sumagmamano a singasing ti naidatag bayat ti session ditoy itay Hulio 28 mainaig iti pannakatimbeng ti bilang dagiti aglugan iti single motor nga agdaliasat iti uneg ti siudad.

Maysa kadakuada ti pannakalimitar ti bilang dagiti aglugan iti single motor iti tallo laeng, ngem masapul a saan a nangatngato ngem uppat ti tawen ti maikatlo a pasahero.

Ngem kinuna ti maysa a nagannak a marigatanda iti dayta a singasing agsipud ta maminduada a mapan agsukon ken agitulod kadagiti annakda nga agbasbasa.

Kinuna ti legislative officer ni Kon. Benjo Verzosa a maikonsidera koma ti klase wenno kadakkel ti motor tapno mapalubosan a tallo ti mabalin nga aglugan.

Ngem segun ken ni Arde, kas maibatay iti linteg nasional, dua laeng ti mabalin nga aglugan iti single motor.

Insingasingna a maikonsidera koma ti oras a mapalubosan ti tallo nga aglugan iti 6:30 agingga iti 7:30 iti bigat ken 4:30 agingga iti 5:30 iti malem.

Nairekomenda ti pannakaadaptar dagitoy a suhestion ken komento para iti pannakatratarna iti maikadua a pannakaibasana.#

 

2 ordinansa mainaig truck, motorsiklo nga agdaliasat iti siudad, maad-adal

VIGAN CITY – Dua nga ordinansa pakaseknan dagiti delivery truck ken motorsiklo nga agdaliasat ditoy siudad ti maad-adal iti konseho.
Continue Reading →