2 pagadalan, natakawan

VIGAN CITY – Karigat ti biag gapu iti nasurok makalawas nga awan ressat a panagtudona ket uray pagadalan, sinerrek dagiti mannanakaw tapno adda makurimesda.

Naireport a natakawan ti Tamag Elementary School iti kompiuter ken gadgets a mapapati a naiwayat idi rabii ti Agosto 17 a matutudo ti tiempo.

Nasukalan ni Francis Socias y Rodriguez, 30, naasawaan, dianitor ti nadakamat a pagadalan, ken residente iti Barangay Tamag a naserrek ti computer room nga agpapaay pay a Learning Resource Center idi napan naglukat iti agsapa ti Agosto 18.

Iti panagimbentario dagiti mangisursuro, naduktalan a natakaw ti dua nga Onion computer unit nga aggatad tunggal maysa iti P5,661.00; 2 nga Onion monitor nga aggatad iti P4,500.00 tunggal maysa; mouse  nga agbalor iti P250.00; keyboard nga agbalor iti P450.00; speaker nga aggatad iti P754.00 ken maysa a connector/PT Link nga agbalor iti P3,000.00 wenno iti kadagupan a P24,775.54.

Naammuan iti inbestigasion a nakastrek dagiti mannanakaw babaen ti panangdadaelda iti padlock ti main door. Ditoy met laeng ti nagnaanda idi pumanaw.

Iti pannakaisurat daytoy, awan pay ti maitudo a nangiwayat iti panagtakaw.

Dua nga aldaw sakbayna, naserrek ti sumagmamano a kuarto ti Bantay East Central School  a masarakan iti Zone 5, Bantay, Ilocos Sur ket natakaw ti computer, petty cash ken groseria idi rabii ti Agosto 14 a di agressat ti panagtudona.

Natakaw iti opisina ti prinsipal ti maysa a set ti personal computer; P312.00 a naikabil iti drawer iti Home Economics room; grocery items ken P50.00 iti school canteen ken  2 a payong iti Grade I-B.

Dinadael dagiti mannanakaw dagiti padlock babaen ti sinsil.

Naduktalan laeng ti panagtakaw idi mapan aglukat ni Rene Pablico y Quisada, 48,  dianitor ti pagadalan iti agsapa ti Agosto 15.

Awan pay ti suspek iti daytoy a panagtakaw.#