SAN ESTEBAN, Ilocos Sur – Saan laeng a kuarta no di pay dua a paltog ti naireport a natakaw iti balay ti maysa a negosiante nga agnaed iti Barangay San Pablo ditoy nga ili idi malem ti Marso 4.
Nagpulong iti polis ditoy idi agarup 12:15 ti malem ti nadakamat a petsa ti maysa a Roderick Suyat, drayber, a natakawan ti balay ti amona a ni Kansu Go Chan, 62, naasawaan, negosiante ken agnaed iti nadakamat a barangay.
Iti panagimbestiga dagiti polis, mapapati a simrek ti di nabigbig a mannanakaw iti tawa ti comfort room a kaapiring ti kuarto ni Chan a mapapati a nakaikabilan dagiti armas ken kuarta.
Natakaw iti kuarto ni Chan ti maysa nga M16, short magazine ti M16 a nakargaan iti 21 rounds, ken 3 M16 long magazine nga awan naggianna nga agbalor iti P145,000.00, ken maysa a cal. 45 (Remington 1943), dua nga 8 shooter ti 45 a nalodan iti 26 rounds nga agbalor iti P20,000.00.
Segun iti report, lisensiado dagiti dua a paltog.
Agtultuloy ti inbestigasion iti nasao a panagtakaw.#