2 paltog, naisuko iti polis

GALIMUYOD, Ilocos Sur – Dua a paltog ti boluntario a naisuko iti polis iti Sinait ken ditoy nga ili idi Nobiembre 14.

Maysa a converted caliber 22 nga addaan iti maysa a magasin nga insuko kenkuana ni Feliciano Lacuesta, Jr. idi Nobiembre 12 ti indatag ni Barangay Captain ti Calingayan, Sinait, Ilocos Sur, iti police station ti nasao nga ili.

Maysa met a homemade shotgun ti insuko ni Jimmy Cortez y Alcantara, 44, baro, ken residente iti Barangay Sapang, Galimuyod, Ilocos Sur iti polis.

Segun ken ni Cortez, impaidulin kenkuana ti nagawan nga amana ti paltog ngem gapu iti amakna a masukalan nga agikut iti daytoy, inkeddengna nga isuko iti polis.

Kinuyog da Barangay Captain Camilo Dal-uyen y Mangluyan ken Barangay Kagawad Rene Astrero y Cortez ni Jimmy a nangisuko iti paltog.#