SINAIT, Ilocos Sur – Dua a paltog ti naisuko iti polis ditoy ken iti Bantay kas resulta ti kampania ti kapolisan maikontra iti loose firearms.
Maysa a homemade caliber 45, awanan serial number ken awan kargana a bala ti insuko ni Chief Tanod Jose Ilacad y Manding, 67, ken residente iti Binacud ditoy nga ili kalpasan ti dialogo para kadagiti barangay officials ti Binacud, Pacis, Uboog, Jordan, Nagbaliotian, Cabarambanan, Marnay, Aguing Calingayan ken Cabulalaan a naangay idi Hulio 25.
Kinuna ni Ilacad a nasarakanda ti paltog iti uneg ti kapilia a mapapati a nabati ti dua a di nabigbig a tattao.
Naipan ti paltog iti police station sa naipaima iti Provincial Crime Laboratory Office, Ilocos Sur PPO para iti ballistic examination.
Kabayatanna, maysa a homemade buckshot nga awanan serial number a nagkarga iti maysa a bala ti Gauge 12 ti insuko ni Sagpat Barangay Captain Rolly Palapala Pacpaco iti police station ti Bantay, Ilocos Sur idi Hulio 23.
Kinuna ni Pacpaco nga insuko ti maysa a kalugaranna ti nasao a paltog kas resulta ti kampania maikontra iti loose firearm.#