2 pammapatay, nagramut iti susik

MAGSINGAL, Ilocos Sur – Dati a susik ti nakagapu iti panangbagkong iti ama iti anakna ken ti kalib-in daytoy sadiay Sitio Puntaverde, Barangay Puro, ditoy nga ili idi rabii ti Agosto 17.

Naideklara a dead on arrival iti Magsingal District Hospital ni Richer Castillo y Tiqui, 38, mangngalap, gapu kadagiti bagkongna iti makannigid a tianna ken makannawan nga abagana.

Manipud iti Tolentino Clinic and Hospital, Sto. Domingo, naiyalis met iti Gabriela Silang General Hospital ni Merlita Villaro y Renato, 32, kalib-in ni Richer, gapu kadagiti sugatna iti nadumaduma a paset ti bagina.

Segun iti report, napan ti suspek a ni Lorenzo Castillo, Jr., y Doniego, 54, iti balay ti anakna ngem nagringgorda a mapapati a nagramut iti dati a susikda a nagtungpal iti panangbagkong ti ama iti anakna babaen ti kitchen knife nga agatiddog iti 11 a pulgada.

Mapapati a naganawa ni Villaro ket insaruno ti suspek a binagsol.

Naaresto ti suspek babaen ti pursuit operation sa naipaagas ti dunor iti ulona ken naipan iti police station para iti naan-anay a pannakaimbestigana.

Kabayatanna, susik met a naparnuay bayat ti panaginomda ti mapapati a nangpatayan ti maysa a lalaki iti katuganganna sadiay Barangay Lungog, Narvacan, Ilocos Sur idi rabii ti Agosto 18.

Segun iti report, nasarakan dagiti nagresponde a polis ti daradara a bangkay ni Cesar Cambe y Cabamungan, 47, naasawaan, mannalon, ken residente iti nadakamat a barangay idinto a ni Marvin Pascua y Obinario, 28, manugang ti biktima ti maitudtudo a nangpatay kenkuana.

Nagsagrap ti biktima kadagiti dunor iti ulona a puon ti impatayna.

Naammuan iti panagimbestiga dagiti polis nga idi rabii ti Agosto 18, naggiinom da Cambe, Pascua ken sumagmamano a kaarrubada iti maysa a kasangay ngem adda saanda a nagkinnaawatan.

Naggawid nga immuna ti Cambe idi tumengnga ti rabii ngem idi agarup ala una ti parbangon, nagenkuentro manen ti manugang ken ti katuganganna ket nagririda.

Idi alas dos iti dayta met la a parbangon, mapapati a napan Pascua iti balay ni Gregorio Gallezo, Jr. ket impalgakna a napapatayna ti katuganganna.

Inaresto dagiti polis ni Pascua iti balayna ken narekobreda ti air gun a mapapati a pinangmalmalo ti suspek iti katuganganna.

Iti pannakaisurat daytoy, maisagsaganan ti kaso maikontra ken ni Pascua.#