TAGUDIN, Ilocos Sur – Gapu laeng iti danum, dandani nagpinnatay ti dua a partidor iti slaughterhouse ditoy.
Nainaganan dagiti dua a da Mark Ordinario ken Ador Villanueva, agpada nga agparparti.
Segun iti inbestigasion, inrareb ni Ordinario dagiti bagbagis ti pinartida a baboy a dalusanna iti dram a napunno iti danum.
Nakita ni Villanueva ti inaramidna ket immasideg sana binagbagaan ti padana a partidor a sayang ti danum.
Ngem mapapati a madi ti panagdengngeg ni Ordinario ket kinaritna ni Villanueva nga iggemna ti maysa a kutsilio. Di met nakateppel ni Villanueva ket kinamatna ni Ordinario.
Inanawa ida dagiti padada a partidor.
Nupay kasta, inreportda ti insidente iti polis.
